Шарын ұлттық паркінде Қызыл кітапқа енген Орта Азия құндызы тіркелді…
Шарын ұлттық паркінде Қызыл кітапқа енген Орта Азия құндызы тіркелді
Шарын мемлекеттік ұлттық табиғи паркі аумағында Қазақстан Республикасының Қызыл кітабына енген, өте сирек кездесетін Орта Азия құндызы (Lutra lutra seistanica) тіркелді.
Сирек жануардың фототұзаққа түсуі – ұлттық парк үшін маңызды ғылыми оқиға. Бірегей бейнематериалдар парк аумағында жүйелі түрде жүргізіліп жатқан ғылыми мониторинг жұмыстарының нәтижесінде алынды.
Орта Азия құндызы – аса сақ әрі жылдам қозғалатын жыртқыш аң. Ол негізінен түнгі уақытта белсенді тіршілік етеді. Сондықтан табиғи ортада бұл жануарды тіркеу ұзақ мерзімді бақылауды және кәсіби зерттеу жұмыстарын талап етеді.
Аталған материалдарды алу мақсатында мемлекеттік инспекторлар мен Ғылым бөлімінің мамандары құндыздың ықтимал тіршілік ету аймақтарын ұзақ уақыт бойы бақылап, кешенді мониторинг жұмыстарын жүргізді. Нәтижесінде сирек түрдің парк аумағында мекендейтіні ғылыми тұрғыда расталды.
Бұл дерек ұлттық парк аумағындағы биологиялық алуантүрліліктің сақталғанын, су экожүйесінің тұрақтылығын және табиғатты қорғау шараларының тиімді жүзеге асырылып жатқанын көрсетеді.
Шарын мемлекеттік ұлттық табиғи паркі табиғи мұраны қорғау және сирек кездесетін жануарлар дүниесін сақтау бағытындағы жұмыстарды жүйелі түрде жалғастырады
